රුපියල් අටදාහකට නිවාසයක්

 

  ”ජන සෙවණ” නිවාස වැඩසටහනට මුදල් වෙන්වෙලා නැහැ කියලා අසරණ වුණු දේශපාලන පක්ෂවල ලේකම්වරුන් ප‍්‍රකාශ කරනවා.ඒක අසත්‍යයක්. වසර 6 කින් නිවාස දශ ලක්ෂය ඉදිකිරීමට අදාළ මුදල එක් වර්ෂයක අයවැය කතාවේ නැහැ. මේක තේරුම්ගන්න බැරි විපක්ෂය ජනතාව වෙනුවෙන් පෙනී සිටින්නේ කොහොමද? මේ වසරේ පළමු කාර්තුව සදහා දැනටමත් මහා භාණ්ඩාගාරයෙන් රුපියල් මිලියන 360 ක් ලැබී තිබෙනවා.”

 

මෙහෙම කියන්නේ වීරවංශ ඇමති තුමා . එයාගේ අමාත්‍යාංශයෙන් ඉදිරිපත් කරලා තියෙන ජන සෙවන නිවාස දශ ලක්ෂයේ වැඩ සටහනට අයවැයෙන් මුදල් වෙන් කරලා නැතිය , ඒ වැඩසටහන නිකම් බොරු පම්පොරියක් විතරය කියල විපක්ෂය නගන චෝදනා වලට පිළිතුරු විදියට තමා එතුමා මේ ප්‍රකාශය කරලා තියෙන්නේ, අමාත්‍යංශයේ නිලධාරි පිරිසක්  ඉස්සරහ.

 

අම්මපා ඇත්තනේ ! එක කාර්තුවකට රුපියල් මිලියන  360 ක් කියන්නේ ලොකු ගානක් . ටාර්ගට් එකට යන්න පුළුවන් වෙයි කියලා  බැලූ බැල්මට හිතෙනවා.

 

ටාර්ගට් එක ගෙවල් දශ ලක්ෂයක් අවුරුදු හයකට .

 

එතකොට අවුරුද්දකට ගෙවල් 166,667 ක්

 

කාර්තුවකට ගෙවල් 41667 ක් . 

 

අය වැයෙන් සල්ලි වෙන් කරලා නැත්නම් ලැබෙන්නේ කොහෙන්ද කියලා අහලා දේශද්‍රෝහියෙක් වෙන ඕනේ නැහැ. අපි සුබවාදීව හිතමුකෝ . 

 

 මිලියන 360 ඒ ගානෙන් බෙදුවාම   එක ගෙයකට රුපියල් අටදාස් හයසිය තිස් නමයයි ශත අනූ තුනක් (8639.93 ) ක්  ලැබෙනවා.

 

ඒ ගානට ගන්න පුළුවන්  වැලි කියුබ් බාගයක්ම .

 

මං හිතන්නේ එතුමා හදන්න යන්නේ වැලි මාලිගා වෙන්න ඕනේ .

 

එතකොට සිමෙන්ති,  ගඩොල් , උළු පරාල , යකඩ ඕනේ වෙන්නේ නැහැනේ . අනික තමන්ටම හදා ගන්න පුළුවන් . බාස් කුලියක් යන්නෙත් නැහැ. අඩු වියදම් නිවාස.

 

කොහොමද එතුමාගේ ටිකිරි මොලේ.