ශ්‍රීලංකා පොලිස් හා දේශීය ආදායම් දෙපාර්තමේන්තුව

 

රේගුව , ආදායම් බදු දෙපාර්තමේන්තුව හා සුරාබදු දෙපාර්තමේන්තුව සාමන්‍යයෙන් ලංකාවේ ආණ්ඩුවට ආදායම් හොයා දෙන ආයතනයි.

වෙන රටවල නම් පොලිසී තිබෙන්නේ නීතිය හා සාමය ආරක්ෂා කිරීමටය. ඒත් ආසියාවේ ආශ්චර්ය වන සිරි ලංකා ඉල්ලංකාවේ පොලිසීයත්  තිබෙන්නේ ආණ්ඩුවට ආදායම් හොයා දීමටය. ලංකාවේ පොලිස් කාරයින්ට ටාර්ගට් දී තිබේ. ඒ ටාර්ගට් කවර් නොකොලොත් බඩුම තමාය. ලොක්කන්ගෙන් බලු බැණුම්ය. ප්‍රොමෝෂන් නැත.

ඒ නිසා මොනවා කර හෝ නියමිත නඩු ගානක් ගෙන ආ යුතුය. දඩ කොල ලිවිය යුතුය. රියදුරන් වැරදි නොකරයි නම් බොරුවට හෝ වැ‍රැද්දක් ලියා දඩ කොල දිය යුතුය. ඉරි දෙක නොකපා යන රියදුරාට වමෙන් ධාවනය නොකලා යැයි කියයි. පැයට කි.මී. 20 ට ගියත් වේගය වැඩිය. කුමක් හෝ වැරද්දක් ලියා නඩු පවරා හෝ දඩ කොල ලියා  ආදායම් එකතු කර දිය යුතුය.

රථවාහන පොලිසීයේ කාරිය විය යුත්තේ අනතුරු වැලක්වීම හා අවම කිරීමය. ඒත් ලංකාවේ කට්ටිය එහෙම නැත. එයාල ‍රැක ගෙන ඉන්නේ අනතුරු සිදු විය හැකි තැන්වල නොවේය. අනතුරු සිදු විය හැකි කලාපය අවසන් වෙන තැන ගහකට මුවා වී හැංගී ගෙනය. උදාහරණයක් ලෙස ඉරි දෙක අවසන් වී කඩ ඉර පටන් ගන්න තැනටත් මදක් ඈතින්ය. ඒ ඉරි දෙක  අවසන් වීමට අඟලක් කලින් එය කපන උන් අල්ලා ගැනීමටය. එහෙම මිස අනතුරු වැලකීමට නොවේය.

කිසිම වැරදි කාරයෙක් සොයා ගන්නට බැරි වුනදාට කඩයක වැසිකිලියක් ඇතුලේ සිගරට් බොමින් සිටින එකෙක් දෙන්නෙක් හෝ අල්ලා ගෙන යයි.නැත්නම් ගෙදර කාමරෙක හැංගී හාමිනෙටත් හොරෙන් අරක්කු බොමින් සිටින එකෙක් අල්ලා ගෙන ප්‍රසිද්ධියේ මත් පැන්  බිව්වා යැයි නඩු දමයි. ඇටමැස්සා දන්නා හඳුනන පොලිස් රාලහාමි කෙනෙක් කිව්වේ තමන්ට අවශ්‍ය නඩු ප්‍රමානය හොයා ගැනීමට බැරි වූ නිසා මත් පැන් ස්වල්පයක් බී ඉතාමත් සාමකාමිව නිවෙස බලා යමින් සිටි තුන් දෙනෙකුන් අල්ලා ගෙන ගොස් නඩු පැවරු බවයි. එසේ නොකලානම් පසු දින ‍රැස්වීමෙදී ලොක්කා තමන්ව නැගිට්ට්වා කලිසම ගැලවෙන්නට බනින බවයි.

මේඇත්ත පසු ගියදා මොණරාගල පැත්තේ ඉන්න ආණ්ඩුවේ උප ඇමතියෙක්ම කියා තිබුණි. මේ ඇමතියා ප්‍රසිද්ධ මොනවාටදැයි ආණ්ඩුවේම හවුල් කාර පක්ෂයක් වෙන හෙලු හෙළ උරුමයේ ඕමල්පේ සොභිත උන්නාන්සේ හෙලි කර තිබිනි. දැන් මේ ඇමතියා තම කතාවෙන් පොලීසීයට කියා තිබුනේ ” පොලීසිය ආණ්ඩුවට බදු එකතු කර දෙන්ට ඕනෑය. ඒත් තමන්ගේ වැයික්කියේ ජනයා හදිසියට බෙහෙත් ටික ගැනීමට රෝහලට යනවිට හෙල්මට් නොදා ගීයා යැයි අල්ලා ගන්ට එපා” කියාය.
ඔහු කියන්නේ එහෙමය . පොලිසීය ආණ්ඩුවට බදු එකතු කර දෙන්න ඕනෑ කියලාය. ආණ්ඩුවේම ඇමත්තෙක් කියූ නිසා ඒක ආණ්ඩුවේ නිල මතය විය යුතුය.

ඒ අනුව අපිට පෙනී යන්නේ අපි ආසියාවේ ආශ්චර්ය කරා අරගෙන යන්න හදන්නේ ජනතාවට දඩ ගසා ලබා ගන්නා මුදලින් බවයි.

සටහන- හෙල උරුමයේ චම්පික උන්නැහේ පරිසර අමාත්‍යාංශය කරන කාලයේ අධෝවාතයට පවා පරිසර බද්දක් අය කර ලොක්කාගේ හොඳ පොතට වැටීමට ට්‍රයි එකක් දුන්නේය.

ජීවිතයට ඉඩ දෙනු

වැඩි කල ඉන්ධන මිලට එරෙහිව ජනතාව වීදි බසිද්දි  එම ජනයා ‍රැවටීම සඳහා පෙරට ආ රෙදි නැතිව හෙලුවෙන් ආණ්ඩුවට  කඩේ යන වීරවංශ  කියා සිටියේ  ආණ්ඩුව තවමත් ඉන්ධන විකුනන්නේ පාඩුවට බවයි.

එහෙත් පුවත් උදෙසා අයි ටී එන් හා සීනිව්ස් පමණක් බලන අමු මැට්ටන් කීපදෙනෙකුන් හැර අනෙකුන් ‍රැවටීමේ හැකියාව වීරවංශාලාගෙන් ශීඝ්‍රයෙන් ගිලිහී යමින් පවතී.වීරවංශලාගේ බොරු දේශප්‍රේමි බයිලා වලින් මේ ගමන නැවත්විය නොහැක.

ඉන්ධන මිලත් සමග අනෙකුත් සියලු භාණ්ඩවල මිල අනිවාර්යෙන්ම ඉහල යනු ඇති අතර බස් හා විදුලිය  දැනටමත් වැඩි කර ඇත. කිරිපිටි මිල රුපියල් 20 කින් වැඩි කිරීමට සැරසෙයි.ගෑස් මිලද වැඩි කිරීම සඳහා සාකච්ඡා වෙමින් තිබේ.

පසුගිය අයවැයෙන් රජයේ සේවකයින්ට වැඩි කල සොච්චම මෙන් දෙතුන් ගුණයක් දැනටමත් ආණ්ඩුව විසින්ම නැවත මංකොල්ල කා ඇත. ඔවුන්ද ඇතුලුව පෞද්ගලික අංශයේ සේවකයින් හා එදිනෙදා දිවි සරි කර ගන්නා කුලී කම්කරුවන්, ධීවරයින් ,ගොවීන් ඇතුලු සියලු ජනතාව ජීවන වියදමට සරිලන පරිදි ආදායමක් නොමැතිව ජීවත් වීම සඳහා මහත් වූ අරගලයක යෙදී සිටී.

මේ අතර ආණ්ඩුව පොඩි එකාගේ කිරිපිටි පැකට්‍ටුවෙන් , භූමිතෙල් ලීටරයෙන් , විදුලි බිලෙන් බදු අයකර එම මුදල් තම සුඛ විහරනයට යොදා ගනිති. රාත්‍රී කාර් රේස් පැවත්වීමට , දැයට කිරුල බඳු නාස්තිකාර සංදර්ශන පැවත්වීමට විය්දම් කරන්නේ එම මුදල්ය.  , නොරොච්චේලේ, නෙලුම් පොකුණ, නැවු නො එන හම්බන්තොට වරාය, ක්‍රීඩා නොකරන දැවන්ත ක්‍රීඩාංගන හදන්නේ රටේ කුඩා දරුවන් මන්දපෝෂණයෙන් පෙලෙද්දීය. නාමල් රාජපක්ෂලාගේ ප්‍රතිරූපය පිම්බීම සඳහා පොදු රාජ්‍ය මණ්ඩල ක්‍රීඩා ලබා ගැනීම සඳහා කෝටි සිය ගණන් වැය කරන්නේ රටේ ජනයාගේ පොකට්‍ටුවෙන් හොරකම් කරන මුදල්ය.වීරවංශලාගේ බිරින්දෑවරූ දේවාල ගානේ යන්නට ඩීසල් ගසන්නේද රටේ මහජනයාගේ මුදලිනි.

රාජපක්ෂ රෙජිමය කරන මේ මහා නාස්තිය හා දූෂණ ගැන රටේ ජනයා අවබෝධ කර ගනිමින් සිටිති. ජනයා පාරට බසින්නේ ඒ නිසාය.

ඒ තමන්ගේ දරුවන් කුසගින්නේ හඬද්දී රටේ නායකයින් කරන මේ මහා විනාශය ඔවුන් දන්නා නිසාය. ඔවුන් එන්ජීඕඑ ඒජන්තයින් හෝ වෙන කිසිවෙක් නොවේ. තම ජීවිතය ගැට ගසා ගැනීමට උත්සාහ කරන අහිංසක මිනිසුන්ය. කුමක් හෝ කර ජීවිතය පවත්වා ගෙන යාමට හැකිනම් ඔවුන් පාරට බසින්නේ නැත.

පසුගියදා ආණ්ඩුවේ තුවක්කු කරුවන් විසින් මරා දැමූ ඇන්ටනි ප්‍රනාන්දුද එබඳු අහිංසක මිනිසෙකි.ඔහු  සෑම දිනකම තම ජීවිතය පරදුවට තබා සැඩ රල සමග පොර බදිමින් මුහුදු ගියේ තම දරු දෙදෙනාගේ කුසගින්නේ නොතබා ජීවත් කරවන්නටය. මහ එවුන්ගේ පුතුන්ට කාර් රේස් පදින්නට, වීරවංශලාට මාලිගා තනන්නට අවශ්‍ය මුදල් සොයා ගැනීම සඳහා තමන්ගේ එම අහිංසක බලාපොරොත්තුවත් උදුරා ගන්නට ආණ්ඩුව උත්සාහ කරන විටය ඔහු තම සගයින් සමග පාරට බැස්සේ.

මේ මහා දේශප්‍රේමි ආණ්ඩුව වෙඩි තබා මැරුවේ තම දරුවන් කුසගින්නේ නොතියන්නැයි හඬ ගා කියු මිනිසෙකුටය.

පසු ගිය  දා ජනාධිපති වරයා මහජන කැලඹීම් මැඩීමට සන්නද්ධ හමුදා බලාත්මක කලේ  මෙලෙස මිනිසුන් මරමින් තමන්ට එරෙහිව නැග එන ජනතා විරෝධය නවත්වන්නට හැකි  වේ යැයි සිතා බව පෙනේ.

කියුබාවේ බැටිස්ටා, පිලිපිනයේ මාකෝස්, ඉරානයේ ෂා, ලිබියාවේ ගඩා‍ෆි, ඊජිප්තුවේ මුබාරක්, ටියුනීසියාවේ බෙන් අලි ආදි ඒකාධිපතින් සියලු දෙනාම සිතුවේත් ඒ ආකාරයටය.එහෙත් ඔවුන් සියලු දෙනා අවසානයේ වැ‍ටුනේ ඉතිහාසයේ කුණු බක්කියටය.

සකල දේසවාසි බත් ගොට්ටනි එක්වවු

අපේ කට්ටියක් අද හැන්දෑවේ කො‍ටුවේ  උද්ගෝසනයක් කොරන්ටයි යන්නේ , ආන්ඩුවටයි ඒකේ මහ තැන් වලටයි සහය පල කරලා. උන්නැහේලා අපේ රටට , වැඩ කරන ජනතාවට,  ඔච්චර මහන්සි වෙලා කරන සේවය වෙනුවෙන් අපි රට වැසියෝ මේ වගේ සහයක්වත් නොදුන්නොත් අපි දේසද්‍රෝහීයෝ වෙනවානෙ.

 උන්නැහෙලා අපේ රටට කරන සේවය මොකක්ද  කියලා අමතක නම් ඕන්න තියෙනවා පහලින්. ඔය ටිකක් විතරයි. හදිසියේ නේ මේ සටහන ලිව්වේ , ඔක්කොම ලියන්ට වේලාවක් නැහැ. මාත් යන්ට එපැයි උද්ගෝසනයට. ඉතින් යන්ට කලින් වැඩේට පොඩි ප්‍රසිද්දියක් දීලම යන්ට හිතුනා , කට්ටිය ටිකක් ගෙන්න ගන්ට . ඒවා අපේ යුතුකම්නේ. කොහෙද අර පෙරමුනේ රාලලාවත් හිටියානම් හොඳ පබ්ලිසිටියක් දෙයි වැඩේට.

මෙන්න වැඩ කිඩ.

1.හාමතේ ඉන්න පහල මට්ටමේ රජයේ සේවකයින්ට පඩි වැඩි නොකර සොච්චම් මුදලක්  පඩියට එල්ලීම.

2. පෞද්ගලික අංසයේ සේවකයින් ගැන කෙල බිංදුවක් වත් නොහැලීම.

3. අය වැයෙන් සුපියල සීයට තුනකින් බාල්ඩු කොරලා බඩු මිලට කෙලීම

4. පොඩි එකාගේ කිරි පැකට් එකේ ,අල  ගෙඩියේ , ලූනු බිකේ සිට සබ්බ සකල මනාවටම බදු ගැසීම

5. එහෙව් බදු මුදල් තමන්ගේ පෞද්ගලික බූදල් සේ සලකා මිහින්ලංකා , කොමොන්වෙල්ත් ගේම් , මාලිගා දන් සැල් ආදි දහදුරා වැඩට වියදම් කිරීම

6. මිනීමරුවන්ට ,ස්ත්‍රී දූසකයින්ට , හොරුන්ට , රාජ කරුනාව දී ම.

7. සල්ලි වලට ගන්න පුලුවන්  හැම එකාම සල්ලි වලට අරගෙන සක්විති වීමට සෙට් වීම

8. විරුද්ද උන් හම ගැසීම

9. රටේ හොඳම ඉඩම් කුනු කොල්ලෙට විදේසිකයන්ට විකිනීම

10.දුවා දරුවන්ගේ  අද්යාපනයට, සෞඛ්‍යයට වෙන් කරන මුදල් කැපීම

11. ……..මෙහෙම ලිය ලිය හිටියොත් මට වැඩේට යන්න වෙන්නේ නැහැ…

ඕන් අපි ගියා

දෝරේ ගලන ප්‍රජාතන්තරේ-Democracy Overflowed

වීරවංශ ඇමත්තා තමන්ගේ ඇම්බැට්ටයොත් එක්ක පහු ගිය දාක එක්සත් ජාතින්ගේ කාර්යාලය වට කරලා ඒකේ හිටිය ගැබිණි අම්මලායි, අනිත් නිලධාරින්වයි ප්‍රාණ ඇපයට ගත්තා. උන්නැහෙලා එතෙන්ට ආවේ මහා පෙරලියක් කරගෙන, මාර්ග බාධක  පෙරලගෙන ,යකඩ වැටවල් බිඳ ගෙන. හැබැයි පොලිසියේ මහත්තුරු ඒවා නවත්තන්න කිසි දෙයක් කලේ නැහැ. ඒ විතරක් නෙවේ ,ඉහලින් ආපු අණට කීකරු වෙලා එතැනින් ඉවත් වුනා. එතන හිටපු නියෝජ්‍ය පොලිස් පති තුමා ගේ තොප්පිය පැහැර ගන්න කොට වත් එතුමා නෙවේ නිකමටවත් අතක් ඉස්සුවේ.

එක්සත් ජාතින්ගේ කාර්යාලයේ හා නිලධාරින්ගේ ආරක්ෂාවට පොලිසිය මැදිහත් වුනේ නැත්තේ ඇයි කියලා අහන කොට ජී.ඇල්. පීරිස් ඇමත්තයා කිව්වේ උද්ඝෝෂණය කරන්න රටේ ජනතාවට අයිතියක් තියෙනවාය, ඒ ප්‍රජාතන්ත්‍රිය අයිතියට  රජය බාධා කරන්නේ නැතිය කියලා.

මේ කතාව අහගෙන හිටපු ප්‍රජාතාන්ත්‍රික ජාතික පෙරමුණේ පිරිසක් පහු ගිය 12 වැනිදා ගාල්ලට ගිහින් ,ජෙනරාල් සරත් ෆොන්සේකා නිදහස් කරන්න කියලා උද්ඝෝෂණය කරා. නිදහස කොහොම වෙතත් , පොලිසිය ඇවිත් කට්ටියට කඳුලු ගෑස් ගහලා ,හොඳ හැටි පහර දීලා දහ දොලොස් දෙනෙක්ව ඇදගෙන ගිහින් පොලිස් කූඩුවට දැම්මා. ඊ ලඟට මේක ගැන පැමිණිලි කරන්න පොලිසියට ගිය ඒ පෙරමුණේ මන්ත්‍රිවරු තුන් දෙනෙක්ව බොරු චෝදනා කරලා කූඩුවට දැම්මා.( හැබැයි මෙතනදි නම් පොලිසිය පොට වරද්ද ගත්ත බවක් පේන්න තියෙන්නේ , ඒ තුන් දෙනා එක්ක පොලිසියට ගිය අර්ජුන රණතුංග  මන්ත්‍රිවරයා ආපහු එවීම නිසා. ඇතුලේ වුන සිද්දිය ගැන සාක්කි දැන් එලියේ තියෙනවා)

මොකක්ද මේ වුනේ. ජී.ඇල්.පීරිස් මහත්තයා ජූලි මාසේ තියෙනවැයි  කියපු ප්‍රජාතන්ත්‍රික අයිතින් අගෝස්තු මාසේ වෙන කොට  අහෝසි වෙලා ගිහින්ද. එහෙම නැත්නම්, රටේ අනිත් හැම සම්පතක්ම වගේ ප්‍රජාතන්ත්‍රයත් තියෙන්නේ රජ පවුලටයි, ඒ වටේ ඉන්න හෙන්චයියොන්ටයි විතරක්ද?

පහු ගිය මාසේ රටේ ලොකු දේශපාලන වෙනසක් නොවුනු නිසා ජූලි මාසේ තිබුනු ප්‍රජාතන්ත්‍ර අයිතින් අගෝස්තු මාසේ වෙන කොට නැති වෙන්න බැහැනේ.

ඒ නිසා අපිට හිතාගන්න තියෙන්නේ , ජී.ඇල්. පීරිස් මහත්තයා රටේ ජනතාවට උද්ඝෝෂණය කරන්න නිදහස තියෙනවැයි කියන කොට ඒකෙන් අදහස් කරන්නේ රාජපාක්ෂිකයෝ පමණයි කියලා අපි තේරුම් ගන්න ඕනේ. 

ප්‍රජාතන්ත්‍රවාදයේ මවු බිම වුනු ග්‍රීසියේ වත් හැමෝටම චන්ද බලය තිබුනේ නැහැ. එහෙදිත් ඔය අයිතිවාසිකම් භුක්ති වින්දේ පුර වැසියෝ කියලා හඳුන්වා ගත්තු සුලු පිරිසකට විතරයි. වහලුන්ටවත් කාන්තාවන්ටවත් චන්ද බලය තිබුනෙ නැහැ.

ප්‍රජාතන්ත්‍රවාදයේ මවු බිමෙත් එහෙම නම් අපි විතරක් මොකටද කොල්ලටයි බල්ලටයි හැම එකාටම  ඔය පොරොජාතන්තරේ දෙන්න යන්නේ.

ඒක නිසා ජී.ඇල් පීරිස් මහත්තයා මෙ රටේ උද්ඝෝෂණය කරන්න නිදහස තියෙනවැයි කියන කොට ඒ නිදහස තමන්ටත් තියෙනවා කියලා හිතා ගෙන උද්ඝෝෂණ කරන්න ගිහින් පොලිස් කූඩු වල ලගින්න වුනාට  පීරිස් උන්නැහැ පලි නැහැ.

කොහොමටත් මේ ගොල්ලෝ තමන්ගේ පවුලේ උදවිය ඇරෙන්න අනිත් ඔක්කොම තමන්ගේ වහල්ලු කියලා හිතා ගෙන ඉන්න බවක් තමා මේකෙන් ඔප්පු වෙන්නේ. කොච්චර දැඟලුවත් , වීරවංශ ලාගේ, ජී. ඇල්. ලාගෙ තත්වයත් ඒකයි. වහල්ලු දඟ නොකර ඉන්න කම් ඉඳුල් ටිකක් හම්බ වෙයි.  රජ්ජුරුවන්ට කොච්චර  වහල් වැඩ කලත් වහලා වහලා මයි, කවදාවත් ඔ‍ටුන්න හම්බ වෙන්නේ නැහැ.

මේ රජ ගොල්ලෝ  ජනතාව තමන්ගේ වහල්ලු කියලා හිතන් ඉන්නවා මදිවට ජනතාව හිතන්නෙත් තමන් රජ්ජුරුවන්ගේ  වහල්ලු  කියලා.

ඒ නිසා මේ  වහල් බවට පත් වෙලා නිදා ගෙන ඉන්න සමාජය අවදි  කරන්න නම් ස්පාර්ටකස් කෙනෙක් ම ඕනෙ වෙයි වගේ.

සරසවි සිසු මරණය හා දෙරණ මාධ්‍ය අප්පුලාගේ ඇපිල්ලීම- Death of Susantha Bandara and Truth First

 

මේ දිනවල මාගේ ප්‍රියතම මාධ්‍ය දෙරණ නාලිකාවයි. ඔවුන් තම පුවත් විකාශය හඳුන්වා ගන්නේ “සත්‍යය ප්‍රථමයෙන් -truth first ” යනුවෙනි.

මෙයින් අදහස් වන්නේ ප්‍රවෘත්ති කියන විට ඔවුන් මුලින්ම කියන දේ , එනම් නිවේදකයින්ගේ නම ගැන නම් එය සත්‍යය බවට සැකයක් නැත. තම ආදර්ශ පාඨයේ පරිදි මුලින්ම මේ ඇත්ත කියන ඔව්හු ඉන්පසු මුසා දෙඩීම පටන් ගනිති.

රුහුණු සරසවියේ සිසුවෙක් පහර දීමකින් මිය ගොස් ඇත. සිසුන් පවසන පරිදි මෙය පොලිසියේ වැඩකි. පොලිසිය කියන්නේ මෙය ස්වභාවික මරණයක් බවත් , සිසුවා මිය ගොස් ඇත්තේ මොළයේ නහරයක් පිපිරීමකින් වූ අභ්‍යන්තර ලේ ගැලීමකින් බවත්ය.

 සුසන්ත බණ්ඩාර    සිසුවා

මේ අතර වාර්තා වන පරිදි සිසුවා බදුල්ල රෝහල් පොලිසියටද පවසා ඇත්තේ , තමන්ට පොලිසිය පහර දුන් බවකි. ඔහු කට උත්තරය දෙන විට ඔහුගේ මවද ඒ අසල සිට ඇතැයි කියවේ. නමුත් දැන් , ඇය කුමක් හෝ හේතුවකට , තමන්ට පහර දුන්නේ පොලිසිය විසින් නොව සිසුවෙකු විසින් යි තම මිය ගිය පුතු කී බවක් කියයි. 

 දෙරණ නාලිකාවට නම් මෙය වෙනත් සිසුවෙකුගේ වැඩකි. මෙරට ජනතාවට අකුරු කියවීමට බැරි නිසා ඔවුන් ට පත්තර කියවා දීමට එන දෙරණ නාලිකාවේ නපුංසක මාධ්‍ය අප්පු අද උදේ පුන පුනා පැවසුවේ මෙය වෙන සිසුවෙකුගේ වැඩක් බවය. වහාම එම සිසුවා අත්අඩංගුවට ගෙන මෙරට නීතිය ආරක්ෂා කල යුතු බව ඔහු පොලිසීයට නැවත නැවතත් මතක් කර දුන්නේය .

දැන් තත්වය වෙනස් වී තිබිය හැකි වුවද. අද උදේ වෙන විටත් පොලිස්පති වරයා පවා මෙම මරණය වෙනත් සිසුවෙකුගේ ක්‍රියාවක් බව නො පැවසීය. ඔහු කියා සිටියේ සුසන්ත බණ්ඩාර    සිසුවා මිය ගොස් ඇත්තේ මොලයේ ලේ ගැලීමකින් බව පමණි. තම සගයින් ආරක්ෂා කර ගැනීම උදෙසා කතා ගොතද්දී පවා , ඔහු පවා මේ ඊනියා මාධ්‍ය කරුවන්ට වඩා සාධාරණ විය.

නමුදු කුලියට කහින දෙරණ නපුංසක මාධ්‍ය අප්පුට අඩුම තරමේ එයවත් නොපෙනේ. සරසවි සිසුන් කෙරෙහි තමා තුල ඇති බද්ධ වෛරය ඔහු අමු අමුවේ මුදා හරියි. බත් පත වෙනුවෙන් ඕනෑම සක්කිලි වැඩක් කරන මේ කුලී බුරන්නා ට අනුව පොලිසිය අතින් එවැන්නක් සිදු වීම සිතන්නටවත් බැරිය .

සිය නේවාසිකාගාරයට රැගෙන යන බව කියමින් ගෙන ගිය සිසුන්ට පොලිසිය විසින් එලවා එලවා පහර දුන් බවට සිසුන් කරන ප්‍රකාශ ගැන මේ මාධ්‍ය ඔස්තාර් ලාට වගේ වගක් නැත. ඔවුන් අමු නිරුවතින්ම මගට බැස , කිසිදු ලැජ්ජාවකින් තොරවම , තම ස්වාමි දුව තමන්ට පැවරු කාරිය අකුරටම ඉෂ්ට කරමින් සිටිති .එනම් මේ ඒකාධිපති පොලිස් තන්ත්‍රය  වෙනුවෙන් කඩේ යමින් සිටිති.

එක සිසුවෙකු නොව මෙරට සියලු ජනතාව හැඳි ගැවි ගියත් ඔවුන්ට කම් නැත. ඔවුන්ට වැදගත් තම කුස පුරවා ගැනීම පමණි. තම මවු විකුණා හෝ ඔවුන් එය ඉටු කර ගනු ඇත.