Posts Tagged ‘දිවයින’

logo

නලින් සිල්වා, ගුණදාස අමරසේකර, චම්පික රණවක, විමල් වීරවංශ පමණක් නොව බ්ලොග් අවකාශයේ සැරිසරු පෙරමුණේ රාල, රංග මිගාර වැනි  සකල විධ සිංහල ජාතිවාදි උම්මත්තක පැසිස්ට්වාදිනුත්    අයි ටී  එන් දිණමින , දිවයින වැනි පඩංගු මාධ්‍යයත්  පසු ගිය කාලය පුරාවටම ශ්‍රී ලාංකීය සමාජය තුල වැපිරූ ජාතිවාදි බීජ  දැන් පැලවී පල දරමින් තිබේ.

දෙමල කම්කරුවෙකු තමන්ට සර් නොකීවා යැයි උරණ වූ හමුදා සෙබලෙකු ඇතුලු  වර්ගවාදි උම්මත්තකයින් පිරිසක් ඇල්පිටිය දිවිතුර ප්‍රදේශයේ වත්තකට කඩා පැන වතු කම්කරු නිවාස තිහක් පමණ මංකොල්ල කා ගිනි තබා විනාශ කර ඇත.

මේ ක්‍රියාත්මක වන්නේ පසුගිය කාලය පුරාවටම දිවා රෑ දෙකෙහිම රට තුල ප්‍රචාරය කල මහා සිංහල වර්ගවාදයයි. මේ ක්‍රියාත්මක වන්නේ දේශප්‍රේමය යනුවෙන් හඳුන්වමින් හීන් සීරුවේ ජනතා සිත් තුලට එන්නත්  කල හිට්ලර් පන්නයේ වර්ගවාදයයි. කපටි අමන ජාතිවාදි දේශපාලුවන්  විසින් රවටනු ලැබු නූගත් ගැමියන් තමන්ගේම සහෝදර දෙමල ජනයාට පහර දෙති.

ජාතිවාදය හා ආගම්වාදයට  නූගත්ගැමියන් පමණක් නොව උගතුන් යැයි සැලකෙන උන් පවා ඉතාමත් ලෙහෙසියෙන් ගොදුරු කර ගත හැකි ය. වීරවංශලා හා රණවකලා මේ දෙකම තම බල ව්‍යාපෘති වෙනුවෙන් ඉතාමත් කපටි ලෙස භාවිතා කරමින් සිටිති. මහජන මුදල් රිසී සේ සොරා කමින් , සුර සැප විඳින මේ විගඩමුන්  ඒ සැප සම්පත් දිගටම තබා ගැනීම වෙනුවෙන් නග්න ලෙස ජාතිවාදය හා ආගම්වාදය භාවිතා කරති.

මේ ආකාරයේම කපටි හා තුච්ච දේශපාලුවන් විසින් රවටනු ලැබු ජනතාව මීට පෙරද, 1958, 1977 හා 1983 දී  මෙරට ගිනි තැබූහ.

වීරවංශලා තමන්ගේ ප‍ටු අභිමතාර්ත වෙනුවෙන් අද  මේ රට නැවතත් දක්කා ගෙන යමින් තිබෙන්නේ එතැනටය.

ඔවුන්ගේ මේ උත්සාහය වහාම පරාජය කල යුතුව ඇත. ජාතිවාදයේ ගිනි දැල් ඇවිලවීමට තම අනුගාමිකයන් පොලඹවන මේ තක්කඩි රොත්ත  පරාජය කල යුතුය. එසේ  නොකලොත් හෙට දිනය දැනට තිබෙනවාටත් වඩා බොහෝ කලුවර වනු ඇත.

සටහන- සිංහලුන්ට නැති දෙමලුන්ට ඇති ප්‍රශ්න මොනවා දැයි කැළණියේ නාථදේවාලයේ ප්‍රධාන කපු තැන්පත් නලින් ද සිල්වා ප්‍රමුඛ ජාතිවාදින් නිතර අසන ප්‍රශ්නයකි. මේ තිබෙන්නේ ගාල්ලේ ජාතිවාදින් විසින් ඊට දී ඇති පිලිතුරයි.

 

 

 

“නඩු නැති රටට මොකට පායනවද සූරියා”

එහෙම ඇහුවේ ප්‍රදීපා ධර්මදාසය. ඒ හුඟාක් කාලෙකට කලින්ය. කොච්චර කලින්ද කිව්වොත් තමන් එහෙම කතාවක් කියලා තියෙනවා කියලා අද ප්‍රදීපාටවත් මතක නැත.ඒ ගැන ප්‍රදීපාට දොස් කියන්න බැරිය. එව්වා එහෙම තමාය.ඒකට කියන්නේ පරිණාමය කියලාය.

හැබැයි ඩාර්වින් කියා දුන් පරිණාමය නෙවේය. ඒ පරිණාමය අනුව ජීවින් එන්ට එන්ට සංවර්ධනය වෙමින් ඉස්සරහට යනවාය. මෙතැන වෙන්නේ ටිකෙන් ටික , ආපස්සට යාමය. ඒ  නිසා මේකට විපරිණාමය කියා කියන්ටත් පුලුවන්ය.

1993 කුප්‍රකට දකුණු පළාත් සභා චන්දේට  ඒ කාලයේ හිටි ජනප්‍රිය, එඩිතර , මානවහිතවාදි ,නිර්භීත පත්තර කාරයෙක් වෙන ඩලස් අලහප්පෙරුමද ඉදිරිපත් වුනාය. ජවිපෙ හිතවාදි කට්ටිය සමග ඒ ගොල්ලොම කරපු ලක්දිව, හිරු වගේ පත්තර වල හිටි ඩලස් ,ශ්‍රිලනිපයෙන් චන්දේ ඉල්ලන්නේ ඇයි කියා ඇහුවම අපූරු උත්තරයක්  දුන්නේය.

රේස් එක දුවන්න අශ්වයෙක් නැත්නම් ඉන්න බූරුවාගේ පිටේ නැගලා හරි දුවන්න එපැයි

ඒකත් හැබැයි කී ප්‍රගතිශීලී ජනතාව වැඩි චන්දෙන් ඩලස් පළාත් සභාවට යැව්වෝය.

ඊ ලඟට 94 මහ චන්දේ ආවේය. ඒ චන්දේට ජේවීපීයත් (ප්‍රගතිශීලි පෙරමුණ ) තරඟ කලේය. හැබැයි ඩලස් පරණ පුරුදු විදියටම ශ්‍රිලනීපෙන්ම තරඟ කලේය. ඩලස් එක්ක සැට් වෙලා පාර්ලිමේන්තු යන්න බලා හිටි විමලසිරි ගම්ලත් සහෝදරයාට මල පැන
” රේස් දුවන්න අශ්වයෝ නැති කාලේ නම් බූරුවෙක් පිටේ ගියාට කමක් නැත, දැන් අශ්වයත් රේස් එකට බැහැලා ඉන්න කොටත් ඩලස් තාම බූරුවා පිටේ යනවා “
ආදි කතා කියමින් ඩලස් ට බැන බැන රට වටේ ගියාය.

ඒ 94 දීය. දැන් 2012 වෙනකොට විමලුයි  ඩලසුයි දෙන්නම එකම බූරුවා පිටේ යනවාය. එව්වා එහෙම තමාය. පරිණාමය හා විපරිණාමය ආදි වශයෙනි.

එදා වගේම අදත් නඩු නැත.

ප්‍රදීප් එක්නැලිගොඩ අතුරුදහන් කොට අවුරුදු දෙකකටත් වැඩිය. තමන්ගේ අර්ථසාධක අරමුදල කොල්ල කන්නට එපා යැයි කියු රොෂේන් මරා දැමුවේය. දෙමල ජනතාවට ප්‍රජාතන්ත්‍රවාදි අයිතිය ඉල්ලූ ලලිත් හා කුගන් අතුරුදහන්ය. ඒත් ඒ කිසිම දෙයක් ගැන නඩු නැත. එහෙව් නඩු නැති රටට මොන සූරියා දැයි අහන්නට ප්‍රදීපලාත් නැත. පිලිම නෙලා නැති විරුවන් ගැන කියන්නට නන්දලාත්  නැත.

නාමල් ලා යෝෂිතලා විතරක් නොව තමන්ගේ දරු දෙදෙනාත් වේලක් හැර වේලක් කා හෝ ජීවත් විය යුතු යැයි කියන්නට පාරට බැස්ස ඇන්ටනි ප්‍රනාන්දු ඔලුව හිල් වෙන්නට වෙඩි තියා මරා දැම්මේය. එදා රතු කමිස ඇඳගෙන වීදි සටන් වලට ජනතාව කැඳවපු වීරවංශ නොහොත් විමලසිරි , ධීවරයින්ට වෙඩි තිබ්බේ ඔවුන් ප්‍රචණ්ඩකාරි විදිහට හැසිරුන හින්දා යැයිද ඒ උද්ඝෝෂණ පිටිපස්සේ ඉන්නේ එන් ජී ඕ යැයිද කියන්නේය.

මිනිසුන් ඌරන් බවට පරිණාමය වීම  ගැන ඩාර්වින්ගේ පොත් වල තියේදැයි අපි දන්නේ නැත. ඒත් එහෙම වෙන බවනම් ෂුවර්ය.

සටහන- අපිට මේ සටහන ලියන්නට හිතුනේ , හිටගෙන ආණ්ඩුවට කඩේ යන දිවයින පත්තරේ වැඩ කරන හෘද සාක්ෂිය තියෙන මිනිස්සු දෙන්නෙක්  ලියු “හලාවත ධීවර ඝාතනයේ ඇසින් දුටු සාක්‌කි කියන නඩු නැති රටක කතාව ලිපිය කියවූ පසුය. ඔබත් එය කියවිය යුතුය. මේ රටට මොකට සූරියා  පායනවාදැයි ඔබට හිතෙනු ඇත.

 

 

 

කලකට ඉහත රූපවාහිනියේ Early Edition  නම් වූ මාලා නාටකයක් විකාශය විය. එහි ප්‍රධාන චරිතය වූ තරුණයාට කලු පූසෙක් විසින් උදයේ පාන්දර පුවත්පතක් ගෙනවුත් දෙයි. එම පුවත් පත අනාගතයට අයිති පුවත්පතකි. එහි තිබෙන වාර්තා දෙස බලා අනාගතයේ සිදු වන විනාශ වැලක්වීමට එම තරුණයාට හැකිය.

මේ ආකාරයේ කලු පූස් මිත්‍රයෙක් ඇට මැස්සාටද සිටියේය. ඔහුගේ පිහිටෙන් ඇටමැස්සා පසුගිය කාලයේ  තම ලිපි ගණනාවක්ම  ලියා අනාගත ලංකාව ගැන අනාවැකි පැවසීය.

ඇටමැස්සා හිතා හිටියේ ලංකාවේ  එවන් කලුපූස් මිත්‍රයෙක් සිටින එකම පුද්ගලයා තමා පමණක් බවයි. එහෙත් එය එසේ නොවන බව පසුගිය දා දැන ගන්නට ලැබුණි.

ඉහල   යන  ජීවන   වියදම  හමුවේ  දිනෙන්   දින  වැඩි  වන  ජනතා  විරෝධය  තොරොම්බල් කර ගැනීම සඳහා ආණ්ඩුව මේ දිනවල නටන ජීනීවා නාඩගමට බෙර ගැසීම සඳහා  අලුතෙන්ම කල එලි බැස ඇති , කලක්  ගඩා‍ෆිට චරිත සහතික ලියමින් සිට හිටි ගමන් ස්වයං අතුරුදහන් වීමකට ලක් ව  සිටි දේශහිතෛෂී ජාතික ව්‍යාපාරය නම් වූ සංවිධානයක මහ ලේකම් යැයි කියා ගන්නා වසන්ත බණ්ඩාර නමැත්තාටද කලු පූස් යාලුවෙක් සිටින බව  ඔහු පසුගියදා  වීරවංශගේ වෙබ් අඩවියට ලියූ ලිපියකින් හෙලි වේ. මෙම ලිපිය  බොහෝ විට  දිවයින නම් වූ ජාතිවාදි පත්තර කඩමාල්ලේද පලව තිබෙන්නට ඉඩ ඇත.

මේ දිනවල ජීනිවා හි පවතින එක්සත් ජාතින්ගේ මානව හිමිකම් සභා වාරයේ න්‍යාය පත්‍රය ගැන ඔහු මෙසේ ලියයි.

“න්‍යාය පත‍්‍රයේ පළමු අංගය වන්නේ ඊනියා දරුස්මාන් වාර්තාවේ නිර්දේශ සමාලෝචනය කිරීමයි. ඊට පසු දෙවන අංගය වන්නේ උගත් පාඩම් කොමිසම් වාර්තාවේ යම් කොටස් දැඩි ලෙස විවේචනය කිරීම සහ ඒ සමගම යම් කොටස් ක‍්‍රියාත්මකකර පෙන්වන ලෙසට රජයට අභියෝග කිරීමයි.”

මොහු මේ කතා කරන්නේ තවම කිසිවෙක් දැක නැති, ඇත්තටම කිවහොත් තවම හදා පවා නොමැති න්‍යාය පත්‍රයක් ගැනය.එහි අඩංගු තාක්ෂණික කරුණු ගැන මෙසේ අති විශ්වාසයෙකින් කතා කරන්නට නම් මොහුට අනිවාර්යෙන්ම කලු පූසෙක්ගේ සහය ලැබිය යුතුය.

ඇමෙරිකානු න්‍යාය පත්‍රයක් ගැන ඔහුට මෙසේ හෙලි කරන කලු පූසා කවුද?

 1989 න් පසු 2004  වනතෙක්ම සැඟවී සැක කටයුතු අතීතයක් ගත කල මොහුගේ කලු පුසා සීඅයි ඒ සංවිධානයද?

සොයා බැලිය යුතු කරුණකි. සියලු දේශප්‍රේමින්ගේ අවධානය පිණිසයි!

1989 භීෂණ සමයේ විදුහල්පති පුත්‍රයා සමග ඇති වූ සුලු ආරෝවක් නිසා විදුහල්පතියා හමුදාව ලවා අහිංසක පාසල් සිසුන් ගණනාවක් මරා දැම්මවීය.

පසුව  1994 දී සූරියකන්දේ වලලා තිබූ එම සිසුන්ගේ ඇටක‍ටු ගොඩ ගත් චන්ද්‍රිකා බන්ඩාරනායක ප්‍රමුඛ ශ්‍රිලනීප නායකයින් එම ඇටක‍ටු විකුනමින් බලයට පැමිනියේය.

ඉන් අනතුරුව 1999 දී එම සිසුන් සිහි කරනු වස් පාර්ලිමේන්තු පාරේ ” අහිංසකයින්ගේ ආරාමය” නමින් ස්මාරකයක් ගොඩ නගන ලද අතර එම ශ්‍රිලනිපය බලයේ සිටිද්දි පසු ගියදා එම ස්මාරකය හොර රහසේම ගලවා දමන ලදි

පහතින් දැක්වෙන්නේ සත් ගුණවත් වෙල්ගම මුදලාලිගේ අර්ථපතිත්වයෙන් යුතුව මහා මානවප්‍රේමි, සකල කලා වල්ලභ ගාමිණි සුමනසේකර ශ්‍රිමතාණන්ගේ කර්තෘත්වයෙන් යුතු දිවයින පත්‍රයේ පසු ගිය ඉරිදා කලාපයේ කිං බානට් තීරුවේ එම ස්මාරකය හැඳින්වීමට යොදා ගෙන තිබුනු වචන කීපයකි. .
” ලස්‌සනට අයිසින් කරපු කේක්‌ ගෙඩියක්‌ උඩ තිබ්බ වසුරු පි`ඩක්‌ වගෙ කැත පස්‌ කන්දක්‌ “.

“මේ කිසිම හැඩයක්‌ නැති මේ පස්‌ කන්ද ..?”

” අංගවිකලාරාමයනේ…”

” අටමගලක්‌… “

“හරියට වර්චස්‌  පිඩක්‌ වගේ ඒක… “

 හැලපාරාමය… මෙලෝ රහක්‌ නෑ…

නිකම්ම නිකම් පස්‌ ගොඩක්‌…”

” හුචක්‌කුව …”

” මේ ඌරු බෙට්‌ට …”

 අවමංගලාරාමේ …”

මේ සුමනසේකරලා පසු ගිය කාලයේ ඇඹිලිපිටිය සිසුන් ගැනත් මෙම ස්මාරකය ගැනත්  කිඹුල් කඳුලු හෙලමින් ලිපි කී සීයක් ලිව්වා දැයි අපි නොදනිමු.

දැන් ඔවුන්ට අහිංසකයින්ගේ ආරාම පෙනෙන්නේ වසුරු ගොඩවල් ලෙසය. 

දැන් අහිංසකයින්ගේ කාලය හමාරය.මේ උදාවී ඇත්තේ සංවර්ධන යුගයයි. පොදු ජනයාගේ සංවර්ධනය නොව රජ මැති ඇමතින්ගේ බැංකු ගිණුම් සංවර්ධන  යුගයයි.අහිංසකයින්ගේ ආරාම එයට බාධාවක් නම් ඒවා ඉවත් කරනු ඇත. සුමනසේකර  බඳු උන්ගේ කාර්ය වනුයේ එම ලොක්කන් කරන සෑම දෙයක්ම හරි යැයි තම පුවත් පත් තුලින් පැවසීමය. ඒ වෙනුවෙන් ඔවුන්ට සොච්චම් ගෙවීමක්ද  ලැබේ. 

ඔවුන් එම සොච්චම වෙනුවෙන් ඕනෑම දෙයක් ලියනු ඇති බවට හොඳම උදාහරණය මේ ලිපියයි.

 

 

 

ශීඝ්‍රයෙන් බිඳ වැටෙන  රුපියලේ සැබෑ අගය අති විශාල විදේශ විනිමය ප්‍රමානයක් වියදම් කරමින් සඟවා ගෙන සිටියත් කොයි මොහොතේ හෝ කඩා වැටීම සිදු වෙනු ඇත.එම නිසා දරා ගත නොහැකි ජීවන වියදම හමුවේ ඉස්සරහට එන නරක කාලයේ වැඩ වර්ජන ‍රැල්ලක් ඇති වෙන්නට හැකි බවට ආණ්ඩුව ගනන් බලා තිබෙන අතර  එම නිසා  දැන්මම  වැඩ වර්ජන වලට කුඩු වෙන්නටම  පහර දීමට ආණ්ඩුව තීරණය කර තිබේ. 

මේ සඳහා අවශ්‍ය පසු බිම සකසා මර්ධනය සාධාරනීකරනය කිරීම  පහුගිය දාක අරලිය මන්දිරේ ගොස් හැලප කා තේ බී පැමිණි බෝතල් පත්තරකාර නඩේටත් රෙදි නැතිව ආන්ඩුවට කඩේ  යන ඊනියා බුද්ධිමතුන්  බුඩ්ඩිමතුන් කිහිප පොලකටත්  පවරා තිබේ.

තේ බී පැමිණ දින දෙකටට පසු වැඩට බසින දිවයින  කර්තෘ මෙසේ කියයි. මෙසේ ඔහු කියන්නේ පසු ගියදා පැවති දුම්රිය වර්ජනය පාදක කර ගනිමිනි.

රජය විසින් කළ යුතු වැදගත් කාරණයක්‌ තිබේ. එනම් එවැනි හදිසි අවස්‌ථාවල සේවයෙහි යෙදවීම සඳහා යුද හමුදාව පුහුණු කිරීමය.

අනෙක්‌ අතට මෙවැනි අවස්‌ථාවලදී දුම්රිය සේවකයන් සම්බන්ධයෙන් නිසි පියවර ගැනීමට ජනතාව සංවිධානය විය යුතුය. තමන්ට වූ අගතිය වෙනුවෙන් දුම්රිය සේවක සංගම්වලට එරෙහිව අධිකරණයට ගොස්‌ ඒවායේ ප්‍රධානීන් හත් අට මාසයකට, ඔවුන්ට කිට්‌ටුවෙන්ම පිහිටි බන්ධනාගාරයට (වැලිකඩ, බෝගම්බර, මීගමුව, මහර, අනුරාධපුරය, ගාල්ල, යාපනය) ගාල් කිරීමට කටයුතු කළ යුතුය.”

දුම්රිය වර්ජනයේ හරි වැරදි වෙනම සාකච්ඡා කල යුතු දෙයකි. ඔවුන් එම වර්ජනය කල ආකාරයේ කිසි වැ‍රැද්දක් ඇට මැස්සා නොදකී. සෑම වර්ජනයක්ම , උද්ඝෝෂණයක්ම උසාවි නියෝ මගින්  නැවැත්වීමට ආණ්ඩුව කටයුතු කරන විට වෘත්තීය සමිති මේ අයුරින් කටයුතු කිරීම අරුමයක් නොවේ. ඒ ගැන වචනයවත් කතා නොකරන දිවයින පත්තරෙන්    මේ  එලියට එන්නේ හැලප දෙකේ හා කෝපි කෝප්පයට දිවයින බෝතල් පත්තරකාරයා ගෙවන මිලයි.

මේ වැඩේට එක් වෙන රනිල්ගේ මාමගේ මිරර් පත්‍රයේ චම්පිකා ලියනාරච්චි මැතිනිය සිය කතු වැකියෙන් කියන්නේ වෘත්තීය සමිති තහනම් කල යුතු බවයි.

මේ අතරේ ඊයේ අයි ටී එන් නාලිකාවේ ඇතුලාන්තය වැඩසටහනට පැමිණ සිටි , මීට පෙර එක්ස් කණ්ඩායම සමග පශ්චාත් නූතනත්වය ගැන දෙඩවූ ධම්ම දිසානායක   නම් වූ පුද්ගලයා කියා සිටියේ මේ ශක්තිමත් ආණ්ඩුව තමන්ගේ හයිය පාවිච්චි කල යුතු බවයි. කප්පම් ඉල්ලන වෘත්තීය සමිති කුඩු කර දැමිය යුතු බවයි. ඔහුට  අනුව මේ අවස්ථාවේ වැඩි පඩි ඉල්ලා කරන වෘත්තීය අරගල නතර කල යුතුය. ජනතාව කෑමට ඇඟට සීමාවන් හදාගෙන ලැබෙන පරිදි ජීවත් විය යුතුය. ජනතාවගේ අනවශ්‍ය වියදම් වන කිරි බීම ආදියට ජනතාව පොලඹවන  කිරි  වෙලඳ දැන්වීම් තහනම් කල යුතු බවද ඔහු කියයි.

මේ සියලු ගොන්නුන් හැරෙන්නේ පොල් පැලය දිසාවට බව පැහැදිලිය.

මාර්ටින් නිමොලර් මතක්  කර ගැනීමට මේ හොඳම  කාලයයි.

“ඔවුන් යුදෙව්වන් සොයා පැමිණියහ………….”

පසුගියදා මාධ්‍යවේදින්(journalists ) යැයි කියා ගත් පිරිසක් විසින් පැවත් වූ කලු ජනවාරිය (January) උද්ඝෝෂණය මවුබිම (motherland) අපකීර්තියට පත් කිරීම සඳහා පැවත් වූ එකක් බව වාර්තා ( report ) වේ. මෙය සංවිධානය (organize) කිරීමට අවශ්‍ය මුදල් (money ) ලැබී ඇත්තේ බටහිර රටවලින් (western countries ) බව දැන ගන්නට ලැබී ඇත.

මෙම ව්‍යාපාරය පි‍ටුපස (behind ) කොටි සංවිධානය (LTTE)   හා ජනතා විමුක්තී පෙරමුණේ කැරලිකරුවන් ද සිටී( sit) . ඔවුන් රජයට (government) එල්ල කරන චෝදනා සම්පූර්ණයෙන්ම(completely ) අසත්‍ය බව රජය (government) කියයි.

මේ අතර ප්‍රකාශයක් (statement) කරන ජනමාධ්‍ය ඇමතිවරයා(minister )   මාධ්‍යවේදීන්(journalists)  වෙනුවෙන් පෙනී සිටින බවට  බොරු බේ ගල්( bay stone) ඇදබාමින් මහ මඟ (road ) බෝඩ් (board) ල්ලාගෙන කෑගසන පුද්ගලයන් (people ) ක්‍රියාකාරීව(active ) මාධ්‍යයේ නියැළෙන්නන් නොවන ( not)  බවත් ඔවුන්ගේ වෑයම රටට එරෙහි කුමන්ත්‍රණ කිරීමේ කොන්ත්‍රාත්තුව(contract )  ඔස්සේ හැකි තරම් ඩොලර් (dollar ) උපයා ගැනීම බවත් පවසයි(said ) .

මේ අය  කිසිවෙකු මාධ්‍යයට  ආදරයක් (media love ) නොමැති බවත් ඔවුන්ගේ ආදරය (theri love )  පවතින්නේ රට පාවා දී ඩොලර්(dollar )  උපයා ගැනීමට පමණක්(only  )බවත් හෙතෙම පැවැසීය.

අද  රට තුළ පවතින්නේ සැබෑ නිදහසක් (freedom ) මෙන්ම සැබෑ මාධ්‍ය නිදහසක් වුවත් එය භුක්ති නොවිඳ( not eating )  රට හැර ගොස් සිටින මාධ්‍ය නඩයට( meedia team ) ඒ ගැන කතා කිරීමට අයිතියක් නැති (no right ) බවද ඇමැතිවරයා (minsiter) කීය.

මේ අතර අතුරුදහන්(vanished )  වී ඇතැයි කියූ ප්‍රගීත් එක්නැලිගොඩ(Eknaligoda )  නැමති දේශද්‍රෝහියා විදේශ රටක (foriegn country ) සැඟවී සිටින බවට හිටපු (ex) නීතිපතිවරයා කල හෙලිදරව්ව් සමග මෙරට (this country) සිටින දේශද්‍රොහී කල්ලි බලවත් (very much)  කලබලයකට පත්ව මෙම උද්ඝෝෂණය සූදානම් කල බවට වාර්තා(report ) ලැබී තිබේ.

ව්‍යාජ (false) මාධ්‍යවේදීන් මෙසේ රට අපකීර්තියට පත් කිරීමට එරෙහිව?(against )  දේශප්‍රේමි මාධ්‍යකරුවන් එක්ව සුදු (white) පෙබරවාරිය නමින් උද්ඝෝෂණයක් කිරීමට සූදානම් (ready) වේ. මහින්ද ගොමසුන්දර, ගාමිණි සුලුදියසේකර, කුනුකනදාස සූරියාරච්චි හා ලැප්ටොප්කුමාර රාමවික්‍රම ආදි දේශප්‍රේමී මාධ්‍යවේදින් මේ සඳහා පෙරමුණ( front )  ගෙන සිටිති.

……………..(අප) කීර්ති පාටකුලසූරිය)…………..

 

කැළණියේ  ආචාරිය සිල්වලා දෙදෙනෙක් සිටිති. එක්කෙනෙක් කැළණිය නාථ දේවාලයේ කපු ධුරන්දර ආචාරිය මඤ්ඤං සිල්වාය. ඇත්තටම මේ කපු තුමා මහාචාරිය කෙනෙක්ය. අනික් ආචාරිය තුමා කැළණිය විෂ්ණු දේවාලයේ අයිතිකාර ආචාරිය මැරසිල්වාය.

මේ දවස් වල දකින්ට අහන්ට ලැබෙන ප්‍රවෘත්ති වල හැටියට මේ ආචාරිය දෙන්නාගෙම කල දසාව හොඳ නැත.

නාථ දේවාලයේ ආචාරිය තුමාට දැනටම කෙලවිලාය. එතුමා මැරෙන කල් දේවාලයේ ඉන්ට ප්ලෑන් ගැහුවත් , එතුමා යටතේ හිටිය කට්ටිය එතුමාගේ පිස්සු කෙලිල්ල ඉවසා ගෙන ඉන්ට බැරිම තැන  එතුමා එලවන්න කියලා කල කෝලහල කරන කොට එතුමා ජැනටල් මෑන් වගේ අස් වෙලා යන්ට ගියේ ,  පිං පිරිහුණු නාථ දෙවියන් වගේය.

දැන් කැළණියේ අනිත් සිල්වාටත් විරුද්දව කැරළි කෝලහාල,විරෝදතා  ඇති වී තිබේ. පිට අය නොව අර කලින් සිල්වාට වගේම ගෝලබාලයින්ගෙන්ය. මොකද මේ මෙච්චර කාලයක් එක පතේ කෑ උන් අපේ සිල්වා උන්නැහේට විරුද්ඩව කැරලි ගහන්නේ .කියලා හොයලා බලන්ට වටින කාරණයක්ය.

දැනට අපිට පේන්ට තියෙන හැටියට නම් වෙන කිසිම දෙයක් නොවේය.මේ හොරකම් කරපු මංකොල්ල කාපුවා බෙදා ගන්ට බැරිව හොර රංචුවක් කරන පොරයක්ය.  ලොකු කුට්ටිය අයිති කර ගෙන ඉන්න ලොකු හොරාට විරුද්දව පොඩි හොරු කරන සටනක්ය.මෙච්චර කාලයක් එක ට හොරකම් කරමින්, මංකොල්ල කමින්, කප්පම් ගනිමින් උන් ටිකක් දැන් විරසක වෙලා එකිනෙකාට විරුද්දව කරන සටනක්ය.

එහෙම නැතිව මේ අර හොඳ මහත්වරු ටිකක් නරක සිල්වාට විරුද්දව ,සිල්වාගේ නරකට විරුද්දව කරන සටනක් නොවේය.ගිලෙන නැවකින් පනින මීයන්ගේ කැ‍රැල්ලක්ද නොවේය.මේ සටනෙන් මොකා දිනුවත් ඉතුරු වෙන්නේ පල් හොරුන්ය.

ඒක නිසා මේ සටන දැකලා අපිට දිවයින මුදලාලිට, විජේවර්දන හාමුට, තිලංග බේබිට වගේ චූන් වෙන්නේ නැත.

අනික, මේ සටනේ ජය පරාජය තීරණය වෙන්නේ රාජකරුණාව ලැබෙන පාර්ශ්වයට බව නිසැකය. දැනට තිබෙන සලකුණු අනුව නාථ දෙවියන්ට බලයක්  විෂ්ණු දෙවියන්ට තියෙනවාය. ඒ නිසා කැළණියේ මහාචාරිය සිල්වාට නොලැබුණු  රාජ අනුග්‍රහයක් කැළණියේ ආචාරිය සිල්වාට තිබෙන බවකි.

ඒ නිසා එතුමා මනාප චන්ද එක්ලක්ෂ පණස් දාහක් තමන්ට දුන්න කැළනිය ඇතුලු ගම්පහ ජනතාවට තව චිරාත් කාලයක් , තම ලොක්කාගේ පිං පිරිහෙන තෙක්ම , සේවය කරනවා ඇත. ඒක නවත්තන්ට ඔය ප්‍රාදේශීය සබා කබ්බන්ට බැරිය.

 

අපේ රටට ජාත්‍යන්තරව සිටින්නේ ඉතා සුළු මිත්‍රයින් ගණනක්ය.  ඒ අපේ පාලකයින්ගේ ඔල මොට්ටල කම් වලට පිං සිද්ද වෙන්නටය.රුසියාව ,චීනය, ඉරානය හා ටික කාලෙකට  කලින් නම් ලිබියාවත් අපේ අතිජාත  මිත්‍රයින්ය. නැත්නම් එහෙම හිතාගෙන ඉන්නවාය.

මේ අයගෙන් චීනයත් රුසියාවත් අපේ මිත්‍රයින් වී ඉන්නේ අපට ඇති ආදරයකට නොව ඔවුන්ගේ ව්‍යාපාරික වුවමනා එපා කම් වෙනුවෙන් බව නොදන්නේ අපේ රටේ සිටින දේශප්‍රේමින් පමණක්ය.  ගිනිකන පොලී මුදලාලි කෙනෙකුන් වන චීනය අධික පොලියට ණය දී අපිව සූරා කන්නේය. ඒ අතර රුසියාව අපේ මුහුදු තීරයේ ඇතැයි කියන තෙල් සම්පතට කෙල හලමින් සිටින්නේ මස් කට්ටක් දු‍ටු  බල්ලෙකු පරිදිය.

ඒකාධිපති ,මානව විරෝධී ,නායකයන් සිටින  ඉරානය වැනි රටවල් අපව ආශ්‍රය කරන්නේ ඔවුන්ටද අපට වී ඇති සන්තෑසියම වී ඇති නිසාය. එනම් ඔවුනටද වෙන මිත්‍රයන්  නැති නිසාය.

ඉතින් අපිට සිටින මේ මිත්‍රයින්  සුලු පිරිස ගැන අපේ දේශප්‍රේමින් හා දේශහිතෛෂීන් හරියට වද වෙනවාය. ඔවුන්ට මොනවා හරි කරදරයක් වුනොත් ඒක අපිට වූ කරදරයක් වගේ පත්තර වලටත් , සඟරා වලටත් ලියනවාය. රූපවාහිනියෙ, ගුවන් විදුලියෙන් පැය ගනන් කඳුලු හලනවාය.

ලංකාවේ ඉඳගෙන දිවයින පත්තරයටයි වීරවංශ ඇමත්තාගේ ලංකා සී නිව්ස් වෙබ් අඩවියටයි  ලිපි ලියා තම මිත්‍රයින් බේරා ගන්නට පුලුවන් යැයි මේ දේශහිතෛෂී මහත්වරු  හිතයි . පහු ගියදා ලිබියාවේ ගඩා‍ෆි නම් අපේ අති ජාත සුපිරි මිත්‍රයාට පහර වැදෙන කොට ඒ මහත්වරු මෙහෙ ඉඳගෙන ලියපු ලිපිවල තිබුනේ එහෙමය.

ගඩා‍ෆිගේ හමුදාවලට දුවන්නට වදිත්දීත් අපේ දේශහිතෛෂී දොස්තර මහත්තුරු අපිට කිව්වේ ගඩා‍ෆිගේ හමුදා බෙංගාසි කැරලිකාරයින්ට එලවා එලවා ගහනවා කියලාය. සදාම්ට කරපු දේ ගඩා‍ෆිට කරන්න බැරි බවය. අපේ දේශප්‍රේමී මහත්තුරු මොනවා ප්‍රාර්ථනා කලත් අන්තීමේදී ගඩා‍ෆි කාණුවක් පල්ලේ සිට අහුවී මලේය. සී නිව්ස් එකටවත් දිවයින මුදලාලිටවත් ගඩා‍ෆි බේරා ගන්ට ඇඟිල්ලක්වත් උස්සා ගන්ට බැරි වුනේය.

ගඩා‍ෆිත් නැති එකේ මේ ගොල්ලන්ගේ දැන් උත්සාහය රුසියාවේ ජාවාරම්කාර ජාතිකවාදි නායකයා වන පුටින්ට කුමක් හෝ සහයෝගයක් දෙන්නටය. ඒකත් අර ගඩා‍ෆිට දුන් සහය වගේමය. සමහර වෙලාවට මේ වැඩේ මේගොල්ලෝ කරන්නේ ස්වයං වින්දනයට වෙන්නත් පුලුවන්ය.
පහුගියදා පැවති රුසියානු මැතිවරණයේ ප්‍රථිපල වීරවංශගේ වෙබ් අඩවිය වාර්තා කරල තිබුනේ ” රුසියානුවෝ ලෝකයක පැතුම ඉ‍ටු කරති, පුටින්ගේ පක්ෂයට විශිෂ්ඨ ජයක්” කියලා.සී නිව්ස් කට්ටියට ඒ ප්‍රථිපලය පුටින් විශිෂ්ට ජයක් වගේ  පෙනුනට මුලු ලොකේම දැක්කා ඒ චන්දේදී පුටින් ශීඝ්‍රයෙන් පසු බැහැලා තියෙන බව. 2007 අවුරුද්දේ 64% වුනු පුටින්ගේ පක්ෂයේ චන්ද ප්‍රතිශතය මේ සැරේ 50% දක්වා අඩු වෙලා. ඒ ප්‍රතිපලයත් අරගෙන තියෙන්නේ මැර බලය හා චන්ද දූෂණ වලින් කියලයි විපක්ෂය කියන්නේ. ජනප්‍රියත්වය ශීඝ්‍රයෙන් පල්ලම් බහින පුටින්ට අපේ දේශප්‍රේමියෝ උදව් කරන්නේ එහෙමයි. අපිට ඉතිරි වෙලා ඉන්න යාලු මිත්‍රයෝ කීප දෙනා ගේ ප්‍රතිරූපය ආරක්ෂා කරගන්න එපාය, මොනවා උනත්.

ඒක නිසා ලබන සතීයේ දිවයින පත්තරේට දේශහිතෛෂී දොස්තර මහත්තුරු ලියයි  පුටින්ගේ  ඓතිහාසික ජයග්‍රහණය හා ඒකෙන් බටහිර කුමන්ත්‍රණ කාරයින්ට සිද්ද වෙන හානිය ගැන වගේ දේවල් , ගිය සැරේ ගත්ත 64% වඩා මේ සැරේ ගත්ත 50%  වටින්නේ කොහොමද වගේ දේවල් .පුටින්  රුසියාව ඇතුලේ තමන්ගේ නම සවුත්තු කර ගත්තත් මෙහෙ ඉන්න අපෙ දේශප්‍රේමින්ගේ ගෝල බාලයින්ට ඒ වග දැන ගන්න අරින්න බැහැනේ .  අපිට කියලා ආයේ මහ ගොඩක්  යාලුවෝ  ඉන්නවයැ.ඉන්න එවුන් ටික දෙනා හොඳ හයිය හත්තිය තියෙන පොරවල් කියලා පෙන්නන්න ඕනේ.

සටහන- දේශප්‍රේමින් දේශහිතෛෂීන් එහෙම වැඩ කරන එක පුදුම වෙන්නදෙයකුත් නැහැ, අපේ සමහර වාමංශිකයෝ මේ මැතිවරණ ප්‍රතිපලය විග්‍රහ කරන විදියට. ජනතා විමුක්ති පෙරමුණේ වාම කණ්ඩායම්ට අයිති  ජනරළ පත්තරේ මේ ගැන ලියපු වාර්තාවේ නම ” පුටින් පහළට- වම ඉහළට ” කියලා. මේ කියන්නේ ගෙනාඩි ෂුගානොව්ගේ රුසියන් කොමියුනිස්ට් පක්ෂය මේ චන්දේදී ආසන 92 ක් ලබා ගැනීම. ගිය පාර ගත්ත 57 ට වඩා ඉදිරියට ගිහින්. කෙරෙන්ස්කිටත් වඩා දකුණෙන් ඉන්න ෂුගානොව්ගේ ජය වමේ ජයක් කියලා හිතනවා නම් වමේ සහෝදරවරුන්ටත් අපිට කියන්න තියෙන්නේ සොරි මල්ලි ,කියලා.

අපි  හැමදාම කියන පරිදි මේ ආණ්ඩුව එදා වේල සඳහා කුමක් හෝ අටමගලයක් අටවා ගනී. එය බෑන් කී මූන් හෝ දරුස්මාන් වාර්තාව හෝ  වීරවංශ පන්නයේ උපවාසයක් හෝ විය හැක. මේ කතා ගොතන්නවුන් සැම විටම අපට කියන්නේ බටහිරයන් මේ රට ගිල ගැනීමට බලා සිටින, මේ රටට විරුද්ධව කුමන්ත්‍රණ කරන පිරිසක්  බවයි. නමුත් බටහිරයන් මේ රටට එතරම් වෛර කරන්නේ මන්දැයි ඔවුන් අපට නොකියයි.

අනිත් අතට මේ බටහිර කුමන්ත්‍රණ ගැන කතා කියන සෑම විටම එම කුමන්ත්‍රණ  පිටිපස මේ රටේ ද්‍රෝහින්ද ඒවාට  ආධාර කරන බව එම කතා කරුවෝ අපට කියති. එම ආධාර කරුවන් ලෙස නිතරම ‍තෝරාගන්නේ එම අවස්ථාවේ රෙජිමයට එරෙහිව නැගී සිටී යැයි සැක කරන උදවියයි.යම් කිසිහේතුවක් මත රෙජිමයට එරෙහිව නැගී සිටී යැයි සැක කරන පිරිස්  රෙජිමයේ මෝඩ , ජාතිවාදි ආධාරකරුවන්ගේ වෛරයට ගොදුරු කිරීමට එය අපූරු උපක්‍රමයකි.

මේ කතා ජනතාව වෙතට පත් කිරීම සඳහා ද වෙනම පිරිසක් සිටිත්. ඔවුන්ද නියම ජාතිවාදින්ය. කැළණියේ නාථ දේවාලයේ නලින් ද සිල්වා කපු මහතා, ජානිපේ ලොන්ඩරියේ  වීරවංශ ,දේශහිතෛෂි කරවල කඩයේ වසන්ත බණ්ඩාර , දිවයින පත්තර කඩමාල්ල මේ තර ප්‍රමුඛ තැනක් ගනී.

දුමින්ද සිල්වා ප්‍රමුඛ පිරිසක් අතින් ශ්‍රිලනීප ප්‍රබලයෙක් වූ භාරත ලක්ෂ්මන් ඝාතනය වීමත් සමග ශ්‍රිලනිපයෙ ප්‍රබලයන් අතර යම් කිසි කළකිරීමක් ඇති වූ බවත් , මෙතෙක් නිශ්සබ්දව සිටි ඔවුන් මේ සිදු වීම ගැන තැන් තැන් වල විවේචනය කරන බවත් පසු ගිය දිනවල වාර්තා විය. ඔවුන් තමන්ට එරෙහිව කැ‍රැල්ලකට යතැයිද එසේ වුවහොත් ආණ්ඩුවට අලුතින් එක් වූ යූ ඇන් පී කරයින් අතින් ගුටි කකා සිටින ගමේ ශ්‍රිලංකා කාරයින්ද එයට එක් වෙතැයි බිය වූ ආන්ඩුවේ ලොක්කන් වහාම ඒ ගැන යමක් කරන මෙන් කුප්‍රකට උපවාස කරුවාට භාර දුන්නේය. ඉදින් යම් හෙයකින් මෑත අනාගතයේදී යම් කිසි ශ්‍රිලනිප නයකයෙක් භාරත ඝාතනය ගැන ඕනෑවට වඩා දැඟලුවොත් ඔහු දේශද්‍රෝහියෙක් කිරීමට අවශ්‍ය පියවර මල්වංශ විසින් ගෙන ඇත. ඔහුගේ වෙබ් අඩවියේ පහත ලිපිය පල වන්නේ ඒ අනුවය.

-ආණ්ඩුව වට්ටන්න බටහිර ඔත්තු සේවයක් ශ‍්‍රීලනිප ප‍්‍රබලයන් මෙහෙයවයි-

ඝාතනයට ලක්වූ භාරත ලක්‍ෂමන් පේ‍්‍රමචන්ද්‍ර මහතාගේ සිද්ධිය උපයෝගී කරගෙන එක්සත් ජනතා නිදහස් සන්ධාන ආණ්ඩුව කඩා බිඳ දැමීමට ප‍්‍රධාන පෙලේ බටහිර ඔත්තු සේවාවක් ක‍්‍රියාත්මක වෙමින් ඇතැයි වාර්තා වේ. ඒ අනුව ශ‍්‍රිලනිප පැරණි ඉහල පෙලේ සාමාජිකයන් පිරිසක් හරහා එම ව්‍යාපෘතිය ක‍්‍රියාත්මක කිරීමට සැලසුම් කර ඇත.

මේ සඳහා මෙරට ප‍්‍රධාන පෙලේ ව්‍යාපාරිකයන් කිහිප දෙනෙක්ද මැදිහත් වී ඇති අතර ඔවුන් හරහා ප‍්‍රධාන පෙලේ අසල්වාසී බුද්ධි අංශයක් යටිතල පහසුකම් සපයමින් සිටින බවද පැවසේ.

එම බුද්ධි අංශයේ අරමුණ වී ඇත්තේ ශ‍්‍රී ලංකාවද ලිබියාවක් ලෙස හුවා දක්වා එවැනි තත්වයක් මඟ හරවා ගැනීම සඳහා නම් වත්මන් පාලනය වෙනස් කල යුතු බව පෙන්වා දීමයි. මීට එක්සත් ජාතික පක්‍ෂයේ කොළඹ ප‍්‍රබල පාර්ලිමේන්තු මන්ත‍්‍රීවරයෙකුගේ සහයද ලබා දෙන බවට තොරතුරු වාර්තා වේ.”

ජවිපෙ පරාජයට හේතුව ජවිපෙමයි යනුවෙන් කලක් ජනතා විමුක්ති පෙරමුණේ මුල් පෙලේ නායකයෙක් වශයෙන් ද වරක් එහි ජනාධිපති අපේක්ෂකයා වශයෙන්ද කටයුතු කර දැන් ශ්‍රි ලංකා නිදහස් පක්ෂයේ පානදුර  නගර සභාවේ සභාපතිතුමා වන නන්දන ගුණතිලක මහතා පසුගිය දීනෙක ගාමිණි සුමනසේකර මුදලාලිගේ දිවයින ඉරිදා සංග්‍රහයට පවසා තිබිණි.

එය ඉතාමත් නිවැරදි ප්‍රකාශයක් බව අප කිව යුතුය.  හැබැයි ඒ නන්දන ගුණතිලක මහතා කියන අර්ථයෙන් නම් නොවේ.

පසුගිය කාලයේ අපරටේ මිනිසුන් රොද බැඳ ගෙන ජවිපෙට චන්දය දුන් ප්‍රධාන හේතු කිහිපයක් තිබිණි.  මොන චෝදනා තිබුනත් ඔවුනට විරුද්ධව සොරකම් වංචා දූෂණ ගැන චෝදනා නොකිරිනි. පක්ෂය ඇතුලත මොනතරම් ගැ‍ටුම්, මතවාදි අරගල තිබුනත් කරලියට එනවිට ඔවුන් සියල්ල එකා මෙන් අවුත් එකම අදහසක් රටට ඉදිරිපත් කලේය.
 
 ඔවුන් ඉතාමත් දැඩි ශක්තිමත් බැම්මකින් බැඳී තිබුනු බවක් පෙනෙන්නට විය. ඔවුන් දේශපාලනය තම පෞද්ගලික සුඛ විහරණය සඳහා යොදා නොගන්නා බවට පොදු හැඟීමක් ජනයා අතර විය.  ඔවුන් තනතුරු පස්සේ නොගියහමනාප සඳහා එකිනෙකා මරා නොගත්හ. 
 
තමන්ට ලැබුණු මන්ත්‍රිකම් ඇමතිකම් පවා ප්‍රතිපත්තිමය කාරණා මත  අතහළ ඔවුන්  දේශපාලනය තම බඩ වඩා ගැනීම සඳහා යොදා නොගන්නා බව පෙන්වමින් සිටියහ.ජනතාවද ඒ බව පිලිගනිමින් 1994 දී එකක් වූ මන්ත්‍රී ආසනය 2004 වනටිට 39 දක්වා වැඩි කර දුන්හ.
 
නමුත් 2008 සිට තත්වය වෙනස් විය. උච්ච අවස්ථාවේදී සියයට පහලවකට ආසන්න වු ඔවුනගේ චන්ද ප්‍රතිශතය දැන් සියයට තුන පන්නා ගන්නේ ඉතා අසීරුවෙනි. මේ මක් නිසාද?
 
නන්දන ගුණතිලක මහතානම් පවසන්නේ 2005 දී රාජපක්ෂ රෙජිමයට එක් නොවී එයට විරුද්ධව කටයුතු කල නිසා  මෙසේ වූ බවය. මෙය ඉතාමත් මොට්ට තර්කයක් බව කිව මනාය. ඇත්තම හේතුව නම් අප ඉහතින් කී ගුණාංග පිලිබඳව ජවිපෙ කෙරෙහි ජනයා තුල වූ විශ්වාශය නැති වී යාමය. එය සිදු වුයේ කෙසේද?
 
මුලින්ම අහිමි වන්නේ ජවිපේ යනු තනි මතයකින් යුත් එකට බැඳුනු විනය ගරුක පිරිසක් යන මතයයි. එය කලේ 2008 දී ජවිපෙන් එලියට විසිවෙන විමල් ඇතුලු පිරිසයි. ඉතින් ජවිපෙ පරාජයට මුල ජවිපෙම, එනම් මේ හිටපු ජවිපෙ කාරයින්ම නොවෙද?
 
ඊලඟට  නන්දන , කමල් දේශප්‍රිය හා විමල් වීරවංශ හා එක් වී ජාතික නිදහස් පෙරමූණ පිහි‍ටුවා ගත්තේය. ඇත්තෙන්ම මොවුන් තිදෙනා ඊට මඳ කලෙකට ඉහතදී එකෙකුට එකෙක් පෙනෙන්ට බැරි තරම් තරහින් උන් පිරිසකි.  විනය ප්‍රශ්නයක් නිසා නන්දනව  පක්ෂයෙන් පලවා හරින සටනේ පෙරමුණේ සිටියේ විමල්ය.
 
 එසේම පක්ෂ ලේකම් කම ලබා ගැනීම සඳහා උත්සහ කර එය නොලැබුණ විට ජවිපෙ හැර ගිය ලාමක් ටිං ටිං කෙනෙක් වන කමල් සමග පක්ෂය හැර යන බවට කමල්ට පොරොන්දු වී අවසාන මොහොතේ පාවා දීම නිසා විමල් ගැනද, පක්ෂ ලේකම් කම තමන්ට ලබා නොදීමට මහත් සේ වෙහෙස ගත්  නන්දන  ගැනද කමල් සිතේ තිබුනේ සුලු ප‍ටු තරහක් නොවේ.
 
මෙවන් වූ තිදෙනෙක් එකට එක්වන්නේම හුදු ආත්මාර්ථය නිසා බව ඉතාමත් පැහැදිලිව පෙනෙන්නට තිබිණි. ජවිපෙ තුලත් සිටින්නේ මෙවැනි වූ පුද්ගලයින්දැයි ප්‍රශ්නය මතු වෙමින් ඉදිරියට ආවේය.
 
එයින් පසු එන්නේ තනතුරු සඳහා කුලල් කාගැනීමේ යුගයයි. සටනින් පරාජිත නන්දන සහ කමල් එලියට විසිවෙන්නේ ඔවුන්ද මේ ජරාජීර්ණ දේශපාලනයේම තවත් ආංශු මාත්‍ර පමණක් බව ඔප්පු කරමිනි. මෙය එයින් නොනවතී. ඉන්පසු එන්නේ ඇමතිකම් ,ජාතික ලැයිස්තු මන්ත්‍රීකම් උදෙසා එකිනෙකා මරාගන්නා යුගයයයි. මුසාම්මිලා, ජාගොඩලා විමලෙලා එකිනෙකා මරා ගනිති. නන්දනලා නගර සභා සභාපතිකමක් වෙනුවෙන් පාලකයින් පස්සේ යමින් පිංසෙන්ඩු වෙයි.
 
 ඊ ලඟට දකින්නට ඇත්තේ වීරවංශලා  ලබාගත් අමාත්‍යාංශ වල සිදුවන අකටයුතුය. කොමිස් වංචා දූෂණ ආදිය වෙනත් අමාත්‍යංශවලින් දශමයකින්වත් වෙනස් නැත. තම  සුඛ විහරණය සඳහා මහජන මුදල් සිතු ලෙස යොදවති. අති සුඛෝපභෝගි වාහන මිලට ගනිති. කෝටි ගනන් වියදම් කර අති සුඛෝපභෝගි නිවාස හදා ගන්නේ තමන් පරම්පරා සල්ලි කාරයන් මෙනි.
 
මේ දෑ දකින ජනතාවගේ හිසට එක් වරම මොවුන් සිහිවන්නේ ජනිපෙ හෝ ශ්‍රිලනිප සාමාජිකයන් ලෙස නොව හිටපු  ජවිපෙ සාමාජිකයන් ලෙසය.ජේවීපී එකේ ඉන්නෙත් මුන් වාගේ එවුන්මදැයි ජනතාව  සිතති. ඉතින් ජනයා ජවිපෙට චන්දේ දෙයිද?
 
නන්දන නිවැ‍රැදිය.ජවිපෙ පරාජයට හේතුව ජවිපෙමය. වඩාත් නිවැ‍රැදිව කිවහොත්  නන්දනලා බඳු හිටපු ජවිපෙ කාරයින්මය.  මේ  වන විට ජවිපෙ කෙරෙහි තද වෛරයකි පෙලෙන නන්දනලාට , ජවිපෙයට හොඳ පාඩමක් ඉගැන්විය හැක. එනම් තමන් තව තවත් දූෂිත , වෙමයි. එවිට ජනතාව තව තවත් ජවිපෙ කෙරෙහි කල කිරී ඔවුන්ට චන්දය නොදී සිටිනු ඇත.
 
සටහන- මහින්ද විජේසේකර බඳු අයත් ජවිපෙ න් ඉවත් වී පසු කලෙක දූෂිත දේශපාලකයින් වුවත් එය ජවිපෙට බල නොපෑවේ ,ඔවුන් එම තත්වයට පත් වූයේ එසේ ජවිපෙන් ඉවත් වී සෑහෙන කලක් ගිය පසු නිසාය. ඇත්තටම ගතහොත් මහින්ද විජේසේකර හිරෙන් නිදහස් වී අවුත් ජවිපෙටත් වඩා වාමංශික පක්ෂයක් තනාගෙන කලක් දේශපාලනය කලේය.